Sugarcane,lemon, coconut water : వేసవి మండిపోతున్న వేళ బయటికి అడుగు పెట్టగానే శరీరం నీరసంగా మారుతుంది. ఇలాంటి పరిస్థితుల్లో దాహం తీర్చుకోవడానికి రోడ్డు పక్కన కనిపించే చెరకు రసం, నిమ్మరసం లేదా కొబ్బరి నీళ్లవైపు మనం సహజంగానే ఆకర్షితులమవుతాం. ఇవన్నీ చల్లదనాన్ని ఇస్తాయనే భావనతో ఏది పడితే అది తాగేస్తుంటాం. కానీ నిజానికి ఈ మూడు పానీయాల ప్రయోజనాలు, శరీరానికి అందించే పోషకాలు, శక్తి వేర్వేరు. కాబట్టి ఏ సమయంలో ఏది తీసుకోవాలో తెలుసుకుంటే వడదెబ్బ నుంచి రక్షణ పొందడమే కాకుండా ఆరోగ్యాన్ని కూడా కాపాడుకోవచ్చు.

Sugarcane,lemon, coconut water : తక్షణ శక్తికి చెరకు రసం

ఎండలో ఎక్కువసేపు ప్రయాణం చేసినా శారీరక శ్రమ ఎక్కువగా చేసినా శరీరం అలసటకు గురవుతుంది. అలాంటి సమయంలో చెరకు రసం ఉత్తమ ఎంపికగా నిలుస్తుంది. ఇందులో సహజ చక్కెరలు, కార్బోహైడ్రేట్లు సమృద్ధిగా ఉండటంతో ఇవి రక్తంలో వేగంగా కలసి శరీరానికి వెంటనే శక్తిని అందిస్తాయి. అలసటను తగ్గించి శరీరాన్ని తిరిగి చురుకుగా మారుస్తాయి. అయితే మధుమేహం ఉన్నవారు దీనిని జాగ్రత్తగా తీసుకోవాలి లేదా పూర్తిగా దూరంగా ఉండటం మంచిది. అలాగే బయట తాగేటప్పుడు పరిశుభ్రత, ఐస్ వినియోగంపై ప్రత్యేకంగా దృష్టి పెట్టాలి.

Sugarcane,lemon, coconut water : రోగనిరోధక శక్తికి నిమ్మరసం

సులభంగా అందుబాటులో ఉండే చవకైన పానీయాలలో నిమ్మరసం ఒకటి. ఇందులో విటమిన్-C అధికంగా ఉండటంతో ఇది శరీర రోగనిరోధక శక్తిని పెంచడంలో కీలక పాత్ర పోషిస్తుంది. శరీరంలో పేరుకుపోయే విషతుల్యాలను బయటకు పంపించడంలో సహాయపడుతుంది. అలాగే జీర్ణక్రియను మెరుగుపరచి చర్మాన్ని కాంతివంతంగా ఉంచుతుంది. ఎసిడిటీ సమస్య ఉన్నప్పుడు లేదా గొంతు ఎండిపోయినట్లనిపించినప్పుడు నిమ్మరసం తాగితే శరీరానికి తక్షణ ఉపశమనం లభిస్తుంది. ఇది శరీరాన్ని తాజాగా ఉంచే సహజ పానీయం.

Sugarcane,lemon, coconut water : ఎలక్ట్రోలైట్లకు కొబ్బరి నీళ్లు

కొబ్బరి నీళ్లు ప్రకృతి ప్రసాదించిన సహజ శక్తివంతమైన పానీయం. ఇందులో పొటాషియం, సోడియం వంటి ముఖ్యమైన ఖనిజ లవణాలు అధికంగా ఉంటాయి. ఎండ వల్ల శరీరంలో తగ్గిపోయే ఎలక్ట్రోలైట్లను తిరిగి భర్తీ చేయడంలో కొబ్బరి నీళ్లు అత్యంత ప్రభావవంతంగా పనిచేస్తాయి. ఇవి శరీరాన్ని లోపల నుంచి చల్లబరచి అలసటను తగ్గిస్తాయి. ఉదయం సమయంలో లేదా వ్యాయామం చేసిన తర్వాత కొబ్బరి నీళ్లు తీసుకుంటే రోజంతా ఉత్సాహంగా ఉండటానికి సహాయపడతాయి.

Sugarcane,lemon, coconut water : ఏది ఎప్పుడు తాగాలి?

శరీర అవసరాన్ని బట్టి ఈ పానీయాలను ఎంపిక చేసుకోవడం చాలా ముఖ్యం. ఉదయం లేదా మధ్యాహ్నం వేళల్లో శరీరాన్ని హైడ్రేటెడ్‌గా ఉంచడానికి కొబ్బరి నీళ్లు ఉత్తమం. తీవ్రమైన అలసట ఉన్నప్పుడు చెరకు రసం తక్షణ శక్తిని అందిస్తుంది. రోగనిరోధక శక్తి పెంచుకోవడానికి, జీర్ణక్రియ మెరుగుపరచుకోవడానికి నిమ్మరసం మంచి ఎంపిక. వేసవిలో కేవలం దాహం తీర్చుకోవడం మాత్రమే కాదు శరీరానికి అవసరమైన పోషకాలు అందించడమూ ముఖ్యం. కాబట్టి ఈ సహజ పానీయాలను సరైన సమయంలో తీసుకుంటూ వడదెబ్బ నుంచి మీరే మీర్ని కాపాడుకోండి.