Uppal MMC Office  : హైదరాబాద్ నగర అభివృద్ధి దిశగా తెలంగాణ ప్రభుత్వం చేపడుతున్న కీలక చర్యల్లో మల్కాజిగిరి మున్సిపల్ కార్పొరేషన్ (MMC) ఏర్పాటు ఒక ముఖ్యమైన మైలురాయిగా నిలుస్తుందని కాంగ్రెస్ పార్టీ నాయకులు పేర్కొన్నారు. ముఖ్యంగా ఉప్పల్ భగాయత్ ప్రాంతంలో మూసీ నది ఒడ్డున MMC ప్రధాన కార్యాలయ భవన నిర్మాణానికి శ్రీకారం చుట్టడం చారిత్రాత్మక పరిణామంగా అభివర్ణించారు.ఈ నేపథ్యంలో ఉప్పల్ నియోజకవర్గ కాంగ్రెస్ పార్టీ ఇంచార్జ్ మందుముల పరమేశ్వర్ రెడ్డి ఆధ్వర్యంలో భగాయత్‌లో ప్రతిపాదిత MMC కార్యాలయ నిర్మాణ స్థలాన్ని కాంగ్రెస్ పార్టీ నాయకులు పరిశీలించారు. ఈ నెల 7వ తేదీన తెలంగాణ ముఖ్యమంత్రి A. Revanth Reddy చేతుల మీదుగా భూమిపూజ కార్యక్రమం జరగనున్న నేపథ్యంలో ఏర్పాట్లను సమీక్షించారు.

Uppal MMC Office జూన్ 7న సీఎం రేవంత్ రెడ్డి చేతుల మీదుగా భూమిపూజ

పరిశీలన కార్యక్రమంలో మేడ్చల్-మల్కాజిగిరి జిల్లా కాంగ్రెస్ అధ్యక్షుడు తోటకూర వజ్రేష్ యాదవ్, రంగారెడ్డి జిల్లా కాంగ్రెస్ అధ్యక్షుడు చల్ల నర్సింహా రెడ్డి, తెలంగాణ రాష్ట్ర రోడ్డు డెవలప్మెంట్ కార్పొరేషన్ చైర్మన్ మల్ రెడ్డి రామ్ రెడ్డి, రాష్ట్ర యూత్ కాంగ్రెస్ అధ్యక్షుడు శివ చరణ్ రెడ్డి తదితర ప్రముఖులు పాల్గొన్నారు. అనంతరం ఏర్పాటు చేసిన మీడియా సమావేశంలో వారు మాట్లాడారు.నాయకులు మాట్లాడుతూ, తెలంగాణలో ప్రజా ప్రభుత్వం ఏర్పడిన తర్వాత ముఖ్యమంత్రి రేవంత్ రెడ్డి నాయకత్వంలో హైదరాబాద్ నగర అభివృద్ధికి అనేక సంస్కరణలు చేపట్టినట్లు తెలిపారు. నగర పరిపాలనను మరింత సమర్థవంతంగా నిర్వహించేందుకు పరిపాలనా వికేంద్రీకరణకు ప్రభుత్వం ప్రాధాన్యత ఇస్తోందన్నారు. ఈ క్రమంలోనే జీహెచ్‌ఎంసీ పరిధిని పునర్వ్యవస్థీకరించి మూడు మున్సిపల్ కార్పొరేషన్ల ఏర్పాటుకు చర్యలు తీసుకున్నట్లు వివరించారు.

Uppal MMC Office పరిపాలనా వికేంద్రీకరణలో భాగంగా MMC ఏర్పాటు

మల్కాజిగిరి మున్సిపల్ కార్పొరేషన్ ఏర్పాటు ముఖ్యమంత్రి ప్రత్యేక చొరవతోనే సాధ్యమైందని, ఇది భవిష్యత్తులో చరిత్రలో నిలిచిపోయే నిర్ణయమని వారు పేర్కొన్నారు. నగర శివారు ప్రాంతాలకు మెరుగైన పరిపాలన, వేగవంతమైన అభివృద్ధి, ప్రజలకు మరింత చేరువైన సేవలు అందించడంలో MMC కీలక పాత్ర పోషిస్తుందని అభిప్రాయపడ్డారు.అలాగే ఉప్పల్ భగాయత్ ప్రాంతంలోని మూసీ నది ఒడ్డున MMC ప్రధాన కార్యాలయాన్ని నిర్మించాలని ప్రభుత్వం నిర్ణయించడం ఈ ప్రాంత ప్రజలకు దక్కిన ప్రత్యేక గౌరవమని తెలిపారు. ప్రస్తుతం మూసీ నది పునరుద్ధరణ కోసం రాష్ట్ర ప్రభుత్వం విస్తృత చర్యలు చేపడుతోందని, నదికి పూర్వ వైభవం తీసుకురావాలనే లక్ష్యంతో పలు ప్రాజెక్టులు అమలు చేస్తున్నట్లు గుర్తుచేశారు.

ఇలాంటి సమయంలో మూసీ నది తీరంలోనే మల్కాజిగిరి మున్సిపల్ కార్పొరేషన్ కార్యాలయ భవన నిర్మాణానికి శ్రీకారం చుట్టడం అభివృద్ధి, పరిపాలన, పర్యావరణ పరిరక్షణలకు ప్రతీకగా నిలుస్తుందని పేర్కొన్నారు. భవిష్యత్తులో ఈ కార్యాలయం మల్కాజిగిరి ప్రాంత అభివృద్ధికి కేంద్ర బిందువుగా మారుతుందని, ప్రజలకు మరింత సమర్థవంతమైన సేవలు అందించేందుకు దోహదపడుతుందని ఆశాభావం వ్యక్తం చేశారు.ఈ కార్యక్రమంలో ఉప్పల్, ఎల్‌బీ నగర్, మేడ్చల్ ప్రాంతాలకు చెందిన కాంగ్రెస్ పార్టీ సీనియర్ నాయకులు, ప్రజాప్రతినిధులు, కార్యకర్తలు పెద్ద సంఖ్యలో పాల్గొన్నారు.