Best Govt Jobs : భారతదేశంలో ప్రభుత్వ ఉద్యోగాలకు ఎప్పటి నుంచీ ప్రత్యేకమైన క్రేజ్ ఉంది. స్థిరమైన జీతం, భద్రమైన భవిష్యత్తు, రిటైర్మెంట్ బెనిఫిట్స్‌తో పాటు సొసైటీలో గౌరవం కూడా వస్తుంది. అందుకే ఎంతోమంది యువత కఠినమైన పోటీ పరీక్షలు రాసి ప్రభుత్వ ఉద్యోగాల కోసం ప్రయత్నిస్తారు. ముఖ్యంగా IAS, IPS, IFS వంటి ఆల్ ఇండియా సర్వీసులు, డిఫెన్స్, న్యాయ వ్యవస్థ, రిజర్వ్ బ్యాంక్ ఆఫ్ ఇండియా వంటి రంగాల్లో అత్యధిక జీతాలు, సదుపాయాలు అందుతాయి.

IAS, IPS, IFS, IFoS అధికారులకు ప్రారంభ జీతం రూ.56,100గా ఉండి, అనుభవం, ప్రమోషన్‌లతో రూ.2.5 లక్షల వరకు పెరుగుతుంది. డిఫెన్స్ సర్వీసెస్‌లో కూడా అధికారులకు సమాన స్థాయి వేతనాలు, ప్రత్యేక అలవెన్సులు లభిస్తాయి. ఇక రిజర్వ్ బ్యాంక్ ఆఫ్ ఇండియా గ్రేడ్ B అధికారులకు రూ.55,200 నుంచి రూ.1 లక్ష వరకు జీతం వస్తుంది. సుప్రీంకోర్టు, హైకోర్టు న్యాయమూర్తుల జీతాలు రూ.2.5 లక్షల పైబడి ఉండటం గమనార్హం.

ప్రభుత్వ రంగ సంస్థలు (PSUs) అయిన ONGC, IOCL, BHEL వంటి కంపెనీల్లో పనిచేసే ఇంజినీర్లు, గ్రాడ్యుయేట్లకు నెలకు రూ.50 వేల నుంచి రూ.1 లక్ష వరకు జీతం లభిస్తుంది. ISRO, DRDO సైంటిస్టులు, ఇంజినీర్లు కూడా రూ.60 వేల నుంచి ప్రారంభించి ప్రమోషన్‌లతో మరింత వేతనం పొందుతారు. ప్రభుత్వ ఆసుపత్రుల్లో వైద్యులు రూ.80 వేల నుంచి రూ.2.40 లక్షల వరకు సంపాదించగలరు. అలాగే, యూనివర్సిటీలలో అసిస్టెంట్ ప్రొఫెసర్లకు రూ.57 వేల నుంచి రూ.1.82 లక్షల వరకు జీతం ఉంటుంది. ఈ విధంగా, 2025లో ప్రభుత్వ ఉద్యోగాలలో స్థిరమైన భద్రతతో పాటు మంచి ఆదాయం కూడా పొందే అవకాశం ఉంది.