Iran Israel Trump : ఇరాన్ మీద అమెరికా అలాగే ఇజ్రాయిల్ సాగిస్తున్న యుద్ధం ఇప్పుడు ప్రపంచవ్యాప్తంగా పెను సంచలనంగా మారింది. ఈ యుద్ధం మొదలైనప్పటి నుండి అమెరికాలోనే కాకుండా ఆ దేశ మిత్ర దేశాల్లో కూడా తీవ్ర వ్యతిరేకత వ్యక్తమవుతోంది. అసలు ఇరాన్ వల్ల అమెరికాకు గానీ లేదంటే ప్రపంచానికి గానీ ఎలాంటి ముప్పు లేదని చాలా మంది భావిస్తున్నారు. ఇలాంటి సమయంలో ఒక నిస్సహాయ దేశం మీద దాడి చేయడం ఏమాత్రం సరికాదని అమెరికా రక్షణ రంగంలో కీలక బాధ్యతలు నిర్వర్తించే అధికారులు కూడా గొంతు విప్పుతున్నారు. పశ్చిమాసియా ప్రాంతాన్ని మొత్తం యుద్ధ మంటల్లోకి నెట్టడం అనైతికం అని వారు బహిరంగంగానే విమర్శిస్తున్నారు.

ట్రంప్ తీసుకుంటున్న నిర్ణయాలకు నిరసనగా అమెరికా కౌంటర్ ఇంటెలిజెన్స్ చీఫ్ జోసెఫ్ కెంట్ తన పదవికి రాజీనామా చేయడం ఇప్పుడు అగ్రరాజ్యంలో పెద్ద షాక్ ఇచ్చింది. ఈయన నేరుగా అధ్యక్షుడికే రిపోర్ట్ చేసే అత్యున్నత స్థాయిలో ఉండేవారు. గతంలో ఆర్మీలో పనిచేసి 11 యుద్ధాల్లో పాల్గొన్న అనుభవం ఈయనకు ఉంది. సిఐఏ లాంటి సంస్థల్లో కూడా కీలక పాత్ర పోషించిన ఈయన రాజీనామా చేస్తూ ట్రంప్ కు ఒక సుదీర్ఘ లేఖ రాశారు. ఇరాన్ తో యుద్ధం అమానవీయమని అలాగే అది అమెరికా ప్రయోజనాలకు విరుద్ధమని ఆ లేఖలో స్పష్టంగా పేర్కొన్నారు. ఈ యుద్ధం వల్ల వేల సంఖ్యలో అత్యున్నత స్థాయి సైనికులను అలాగే ప్రతిభావంతులైన మహిళా అధికారులను అమెరికా కోల్పోయిందని ఆయన ఆవేదన వ్యక్తం చేశారు.

Iran Israel Trump : అమెరికా రక్షణ రంగంలో సంచలనం

ఈ అనవసర యుద్ధం వల్ల అమెరికా శక్తి సామర్థ్యాలు అలాగే దేశ ఖజానా అంతా బూడిదలో పోసిన పన్నీరు అవుతోందని ఆ లేఖలో వివరించారు. పశ్చిమాసియా వ్యవహారాల్లో అమెరికా జోక్యం చేసుకుంటే సామాన్య అమెరికన్ల జీవితాలు బలైపోతాయని ఎంత మంది చెప్పినా ప్రభుత్వం వినలేదని ఆయన విమర్శించారు. ఇజ్రాయిల్ లో ఉన్న కొందరు నేతలు అలాగే అమెరికా మీడియాలోని ప్రభావశీల వ్యక్తులు అధ్యక్షుడిని తప్పుదోవ పట్టిస్తున్నారని ఆయన ఆరోపించారు. అమెరికా ఫస్ట్ అనే నినాదాన్ని పక్కన పెట్టి కేవలం ఇజ్రాయిల్ లాబీకి లొంగిపోయి ఈ దాడులు చేస్తున్నారని ఆయన ఘాటుగా విమర్శలు చేశారు.

అసలు ఇరాన్ తో యుద్ధం ఎందుకు చేస్తున్నామో కూడా అర్థం కాని స్థితిలో అమెరికా ప్రజలు ఉన్నారని ఆయన పేర్కొన్నారు. దేశ సంపదను అలాగే వేల మంది సైనికుల ప్రాణాలను దేనికోసం దారపోస్తున్నామో ఎవరికీ తెలియడం లేదని అన్నారు. అమెరికాకు ఇరాన్ నుండి ఎలాంటి ముప్పు లేదని నేరుగా ఇంటెలిజెన్స్ విభాగం హెడ్ చెప్పడంతో ఇప్పుడు ట్రంప్ చెబుతున్న మాటలన్నీ అబద్ధాలని తేలిపోయాయి. ఈ రాజీనామా అంశం అంతర్జాతీయ మీడియాలో కూడా పెద్ద చర్చకు దారితీసింది. రోజుకో రకంగా అబద్ధాలు ఆడుతూ ప్రభుత్వం ప్రజలను మోసం చేస్తోందని అంతర్జాతీయ మీడియా కూడా రిపోర్ట్ చేస్తోంది. తన సొంత ఉన్నతాధికారి కూడా వ్యతిరేకించడంతో ట్రంప్ ఇప్పుడు ఇరకాటంలో పడ్డారు.