Tamil Nadu Politics : తమిళనాడు రాజకీయాల్లో మొన్నటి వరకూ ఒక లెక్క ఉంటే, నిన్న సాయంత్రం ఎగ్జిట్ పోల్స్ ఫలితాలు వెలువడిన తర్వాత పరిస్థితి పూర్తిగా మారిపోయింది. 2026 తమిళనాడు అసెంబ్లీ ఎన్నికలు (Tamil Nadu Assembly election 2026) ఈ నెల 23న ముగిసిన విషయం తెలిసిందే. అయితే, ఈ ఎన్నికల్లో మొదటిసారి బరిలోకి దిగిన దళపతి విజయ్ పార్టీ ‘తమిళగ వెట్రి కజగం’ (TVK) ప్రభావం పెద్దగా ఉండదని, కేవలం 2 నుండి 4 సీట్లకే పరిమితం కావొచ్చని తొలత భావించారు. కానీ, ప్రముఖ సంస్థ ‘యాక్సిస్ మై ఇండియా’ ఇచ్చిన ఎగ్జిట్ పోల్ అంచనాలు అందరినీ షాక్‌కు గురిచేస్తూ రాజకీయ వర్గాల్లో ప్రకంపనలు సృష్టిస్తున్నాయి.

Tamil Nadu Politics : విజయ్ వైపు తిరిగిన మొగ్గు

యాక్సిస్ మై ఇండియా సర్వే ప్రకారం, తమిళనాడులో టీవీకే (TVK) అత్యంత బలమైన అరంగేట్రం చేయబోతోంది. రాష్ట్రంలోని 234 అసెంబ్లీ స్థానాల్లో టీవీకే 98 నుండి 120 స్థానాలను గెలుచుకునే అవకాశం ఉందని ఈ సర్వే అంచనా వేసింది. అదే సమయంలో అధికార డీఎంకే కూటమి 92-110 స్థానాలకు పరిమితం కావొచ్చని, అన్నాడీఎంకే-బీజేపీ (NDA) కూటమికి కేవలం 32 స్థానాలు రావొచ్చని పేర్కొంది. ఓట్ల శాతం పరంగా చూస్తే టీవీకే 35%, డీఎంకే కూటమి 35% ఓట్లను పంచుకోనున్నట్లు తెలుస్తోంది.

సీఎం రేసులో విజయ్ అగ్రస్థానం:

ఈ సర్వేలో అత్యంత ఆసక్తికరమైన అంశం ఏమిటంటే.. ముఖ్యమంత్రిగా ఎవరిని కోరుకుంటున్నారు అనే ప్రశ్నకు 37% మంది విజయ్ వైపు మొగ్గు చూపారు. ప్రస్తుత సీఎం ఎం.కె. స్టాలిన్ 35% మద్దతుతో స్వల్పంగా వెనుకబడటం గమనార్హం. కేవలం ఏడాది క్రితం పార్టీ పెట్టిన విజయ్, అనుభవజ్ఞుడైన స్టాలిన్‌ను అధిగమించడం రాజకీయ విశ్లేషకులను సైతం ఆశ్చర్యపరుస్తోంది.

అన్నాడీఎంకే సరికొత్త గేమ్ ప్లాన్ – సీఎం ఆఫర్?

ఎన్నికల ముందు విజయ్ పార్టీతో పొత్తు కోసం ప్రయత్నించి విఫలమైన అన్నాడీఎంకే-బీజేపీ కూటమి, తాజా ఎగ్జిట్ పోల్స్ తర్వాత మళ్ళీ రంగంలోకి దిగింది. విజయ్‌తో కలిసి ప్రభుత్వం ఏర్పాటు చేసేందుకు ముమ్మర ప్రయత్నాలు చేస్తోంది. ఒకవేళ ఏ పార్టీకి స్పష్టమైన మెజారిటీ రాని పక్షంలో (Hung Assembly), విజయ్ మద్దతు కీలకం కానుంది. ఈ నేపథ్యంలో, తమ కూటమిలో చేరితే విజయ్‌కు ముఖ్యమంత్రి పీఠం ఇచ్చేందుకు కూడా అన్నాడీఎంకే పెద్దలు సిద్ధమైనట్లు రాజకీయ వర్గాల్లో వార్తలు వినిపిస్తున్నాయి.

ఎగ్జిట్ పోల్స్ అంచనాలే నిజమైతే, తమిళనాడులో ద్రవిడ పార్టీల ఆధిపత్యానికి విజయ్ బ్రేక్ వేయడం ఖాయంగా కనిపిస్తోంది. అయితే, విజయ్ తన సొంత బలంపై ప్రభుత్వం ఏర్పాటు చేస్తారా లేక పొత్తుల దిశగా అడుగులు వేస్తారా అనేది మే 2వ తేదీన వెలువడే అసలు ఫలితాల తర్వాతే తేలనుంది. ప్రస్తుతం తమిళనాడు మొత్తం “దళపతి” విజయ్ రాజకీయ వ్యూహాల వైపు ఆసక్తిగా ఎదురుచూస్తోంది.