Gond and Gond Katira : చూడ్డానికి దగ్గరగా కనిపించడం పేర్లు కూడా కలిపివచ్చేలా ఉండడం వల్ల గోండ్ మరియు గోండ్ కటిరా మధ్య తేడాను చాలామంది స్పష్టంగా గుర్తించలేరు. షాపుల్లో కొనుగోలు చేసే సమయంలో ఈ గందరగోళం మరింత పెరుగుతుంది. అయితే ఈ రెండూ ఆరోగ్యానికి ఉపయోగకరమైనవే అయినప్పటికీ వాటి స్వభావం, శరీరంపై చూపించే ప్రభావం పూర్తిగా భిన్నంగా ఉంటుంది. సరైన అవగాహన లేకుండా వాడితే ప్రయోజనం తగ్గిపోవచ్చు కొన్నిసార్లు సమస్యలు కూడా రావచ్చు. కాబట్టి వీటి ప్రత్యేకతలు తెలుసుకోవడం చాలా అవసరం.

Gond and Gond Katira : గోండ్ అంటే ఏమిటి? దాని ప్రయోజనాలు

గోండ్ అనేది నల్ల తుమ్మ చెట్టు బెరడులో నుంచి సహజంగా లభించే గమ్. చెట్టు బెరడుకు గాయం చేసినప్పుడు బయటకు వచ్చే ద్రవం గాలికి తగిలి గట్టిపడి చిన్న క్రిస్టల్స్ రూపంలో మారుతుంది. ఇది లేత గోధుమ లేదా బంగారు రంగులో మెరిసే రూపంలో ఉంటుంది. చేతిలో పట్టుకుంటే గట్టిగా అనిపిస్తుంది. ఆరోగ్య పరంగా గోండ్ ఒక శక్తివంతమైన ఎనర్జీ బూస్టర్‌గా పనిచేస్తుంది. శరీరానికి బలం అందించడం, అలసటను తగ్గించడం ఇందులో ప్రధాన ప్రయోజనాలు. ముఖ్యంగా ఆపరేషన్ తర్వాత కోలుకుంటున్నవారికి, బలహీనంగా ఉన్నవారికి, ప్రసవం తర్వాత మహిళలకు ఇది ఎంతో ఉపయోగకరం. అందుకే గోండ్ లడ్డూలు తయారుచేసి ఇవ్వడం అనేది భారతీయ సంప్రదాయంలో భాగంగా ఉంది. గోండ్ శరీరంలో వేడిని పెంచే స్వభావం కలిగి ఉంటుంది. కాబట్టి దీన్ని ఎక్కువగా శీతాకాలంలో తీసుకుంటారు. కీళ్ల నొప్పులు, నడుము నొప్పి తగ్గించడంలో కూడా ఇది సహాయపడుతుంది. సాధారణంగా గోండ్‌ను నెయ్యిలో వేయిస్తే అది పాప్‌కార్న్‌లా పొంగి, పఫీగా మారుతుంది. తర్వాత దాన్ని పొడి చేసి లడ్డూలు లేదా స్వీట్స్‌లో ఉపయోగిస్తారు. అయితే వేసవిలో ఎక్కువగా తీసుకుంటే శరీరంలో వేడి పెరిగే అవకాశం ఉంటుంది.

Gond and Gond Katira : గోండ్ కటిరా ప్రత్యేకతలు

గోండ్ కటిరా కూడా గోండ్‌లాగే కనిపించినా కొన్ని ముఖ్యమైన తేడాలు ఉన్నాయి. ఇది మెరుపు లేకుండా మ్యాట్ ఫినిషింగ్‌తో ఉంటుంది. రంగు సాధారణంగా పారదర్శకంగా లేదా హాఫ్-వైట్‌గా ఉంటుంది. దీనిని ఆల్మండ్ గమ్, బాదం పిసిన్ లేదా ట్రగాకాంత్ గమ్ అని కూడా పిలుస్తారు. ఇది ట్రగాకాంత్ అనే వేరే చెట్టు నుంచి లభిస్తుంది. గోండ్ కటిరా శరీరాన్ని చల్లబరచే గుణం కలిగి ఉంటుంది. అందుకే దీన్ని వేసవిలో ఎక్కువగా వాడుతారు. వడదెబ్బ, డీహైడ్రేషన్ వంటి సమస్యల నుంచి రక్షణ కల్పించడంలో ఇది సహాయపడుతుంది. ఇందులో పీచు పదార్థం ఎక్కువగా ఉండటం వల్ల జీర్ణక్రియ మెరుగుపడుతుంది. ఇది కడుపు నిండిన భావాన్ని కలిగిస్తుంది కాబట్టి బరువు తగ్గాలనుకునే వారికి కూడా ఉపయోగపడుతుంది. గోండ్ కటిరాను నెయ్యిలో వేయించరు. దీన్ని రాత్రంతా నీటిలో నానబెడితే ఉదయానికి జెల్లీలా మారుతుంది. ఆ జెల్లీని శర్బత్, నిమ్మరసం, పాలు లేదా మజ్జిగలో కలిపి తీసుకుంటారు.

Gond and Gond Katira : ఎప్పుడు ఏది వాడాలి?

గోండ్ మరియు గోండ్ కటిరా రెండింటి ప్రయోజనాలు వేర్వేరు కావడంతో సీజన్‌కు అనుగుణంగా వాటిని వాడటం ఉత్తమం. శీతాకాలంలో శరీరానికి వేడి, బలం అవసరమైనప్పుడు గోండ్ ఉపయోగించాలి. వేసవిలో చల్లదనం, హైడ్రేషన్ కోసం గోండ్ కటిరాను తీసుకోవాలి. ఇక ఇవి రెండూ ఆరోగ్యానికి మేలు చేసే సహజ పదార్థాలే. కానీ సరైన అవగాహనతో సరైన సమయంలో వాడితేనే పూర్తి ప్రయోజనం పొందవచ్చు.