KJQ Movie Review : దీక్షిత్ శెట్టి, శశి ఓదెల.. KJQ మూవీ రివ్యూ అండ్ రేటింగ్‌..!

KJQ Movie Review : “గెలిచినోడిది ఏముంది.. ఓడినోడి కథ చదువు.. జీవితంలో కొన్ని సత్యాలు అందరికీ సూట్ కావు” అనే ఆలోచన చుట్టూ పుట్టిన కథే ‘KJQ’. దీక్షిత్ శెట్టి, శశి ఓదెల, యుక్తి తరేజా ప్రధాన పాత్రల్లో నటించిన ఈ యాక్షన్, క్రైమ్, ఏ-రేటెడ్ డ్రామా శుక్రవారం ప్రేక్షకుల ముందుకు వచ్చింది. దర్శకుడు కిరణ్ ఆకస్మిక మరణంతో ఈ సినిమా ప్రయాణంలో అనుకోని ఆటంకాలు ఎదురయ్యాయి. సినిమా పూర్తి చేసే సమయంలో ఆయన అనారోగ్యంతో కన్నుమూయడంతో చిత్ర విడుదల కొంత ఆలస్యమైంది. అయినప్పటికీ దర్శకుడి కలను నెరవేర్చాలనే పట్టుదలతో చిత్ర బృందం సినిమాను పూర్తి చేసి ప్రేక్షకుల ముందుకు తీసుకొచ్చింది.విడుదలకు ముందు కొన్ని రోజులుగా చిత్ర యూనిట్ వినూత్నంగా ప్రమోషన్స్ నిర్వహించింది. హైదరాబాద్, విజయవాడ, విశాఖపట్నం ప్రాంతాల్లో ప్రమోషనల్ కార్యక్రమాలు నిర్వహించి సినిమాపై ఆసక్తిని పెంచారు. ఎస్ఎల్వీ బ్యానర్‌పై ప్రముఖ నిర్మాత సుధాకర్ చెరుకూరి ఈ చిత్రాన్ని నిర్మించారు. మరోవైపు ప్రముఖ దర్శకుడు సందీప్ వంగా సైతం ‘KJQ’ ప్రమోషన్స్‌లో పాల్గొనడంతో సినిమాపై మరింత హైప్ వచ్చింది. దర్శకులు సంపత్ నంది, శ్రీకాంత్ ఓదెల వంటి ప్రముఖులు కూడా సినిమా ఈవెంట్లలో పాల్గొని చిత్ర బృందానికి మద్దతుగా నిలిచారు. ఇప్పుడు ఈ సినిమా దేశవ్యాప్తంగా, విదేశాల్లోనూ విడుదలైంది. పలువురు సినీ ప్రముఖుల నుంచి సినిమాకు పాజిటివ్ స్పందనలు రావడంతో ప్రేక్షకుల్లో ఆసక్తి మరింత పెరిగింది.మరి ఇంతగా ఆసక్తి పెంచిన ‘KJQ’ సినిమా నిజంగా ఎలా ఉంది? దీక్షిత్ శెట్టి, శశి ఓదెల, యుక్తి తరేజా తమ పాత్రలకు ఎంతవరకు న్యాయం చేశారు? కథ ప్రేక్షకులను ఆకట్టుకుంటుందా? యాక్షన్, క్రైమ్, ఎమోషన్ కలయిక ఎలా ఉంది? ఇప్పుడు పూర్తి రివ్యూలో చూద్దాం.

KJQ Movie Review : దీక్షిత్ శెట్టి, శశి ఓదెల.. KJQ మూవీ రివ్యూ అండ్ రేటింగ్‌..!

KJQ Movie Review KJQ కథేంటి? కింగ్‌గా మారాలనుకున్న పార్థా కథ

“దావూద్ ఇబ్రహీం, బిన్ లాడెన్ లాంటి వ్యక్తులు తమ పాత్రలు మార్చుకుంటే ఎలా ఉంటారు? వాళ్లు ఇంట్లో ఎలా ఉంటారు? వాళ్లలో ఎలాంటి భావోద్వేగాలు ఉంటాయి? ఒక మంచి జీవితం లభిస్తే వాళ్లు ఎలా జీవిస్తారు?” అనే ఆలోచనలతో సినిమా కథ ప్రారంభమవుతుంది. అనాథలా తిరుగుతున్న పార్థా (దీక్షిత్ శెట్టి) జీవితంలోకి రాజు (మురళీధర్ గౌడ్) వస్తాడు. పార్థాను చేరదీసి తన దగ్గర పనిలో పెట్టుకుంటాడు. అయితే చిన్నప్పటి నుంచి సమాజంలో ఎదురయ్యే అవమానాలు, ఛీత్కారాలు పార్థా మనసులో తీవ్ర ప్రభావాన్ని చూపుతాయి. తనను తక్కువగా చూసే సమాజం ముందు తలవంచి బతకడం కంటే.. ఎదురుతిరిగి కింగ్‌లా బతకాలని పార్థా నిర్ణయించుకుంటాడు. అక్కడి నుంచే అతని జీవితంలో కీలకమైన మార్పులు మొదలవుతాయి.

ఈ ప్రయాణంలో పార్థాకు జాక్ (శశి ఓదెల) పరిచయం అవుతాడు. తల్లిని కోల్పోయిన జాక్‌కు పార్థా దగ్గరవుతాడు. ఇద్దరూ కలిసి పెరుగుతూ మంచి స్నేహితులుగా మారతారు. పార్థా చేసే అనేక నేరాల్లో జాక్ కూడా అతనికి అండగా నిలుస్తాడు. ఆ తర్వాత కథ ప్రేమ, పెళ్లి, కుటుంబ సంబంధాల చుట్టూ కూడా తిరుగుతుంది. మనిషిలో అహం పెరిగినప్పుడు అతని ప్రవర్తన ఎలా మారుతుంది? అధికారం కోసం ఎంత దూరమైనా వెళ్లాలని నిర్ణయించుకున్న వ్యక్తి చివరకు ఎలాంటి పరిస్థితిని ఎదుర్కొంటాడు? అనే ప్రశ్నలకు పార్థా పాత్ర ఓ అద్దంలా నిలుస్తుంది.

మరోవైపు ప్రేమను కోల్పోయిన తర్వాత సాధారణ మనిషిలా బతకాలని నిర్ణయించుకునే జాక్ జీవితం కూడా అనేక మలుపులు తిరుగుతుంది. పార్థా, జాక్ చివరి వరకు కలిసి ఉంటారా? వారి ప్రయాణం ఎక్కడికి చేరుతుంది? వారి మధ్య స్నేహం ఎలాంటి పరిస్థితులను ఎదుర్కొంటుంది? అనేది సినిమాలో చూడాల్సిందే. “బతుకు వేరు.. బతకడం వేరు.. లోకంలో మంచోళ్లు, చెడ్డోళ్లు అంటూ ఎవరూ ఉండరు.. ఎవరి అవసరాలు వారితో కొన్ని పాత్రలు పోషింపజేస్తాయి” అనే భావనతో కథ ముందుకు సాగుతుంది.

KJQ Movie Review: కథను మోసింది యువ తారాగణమే

‘KJQ’లో యువ నటీనటుల పర్ఫామెన్స్ సినిమాకు ప్రధాన బలంగా నిలిచింది. ముఖ్యంగా యుక్తి తరేజా హీరోయిన్‌గా నటించిన క్వీన్ పాత్రలో ఆకట్టుకుంది. పాత్రకు తగ్గట్టుగా తనను తాను మార్చుకుని తెరపై కనిపించింది. క్వీన్ పాత్రలో ఆమె పూర్తిగా ఒదిగిపోయినట్లు అనిపిస్తుంది. ఇక శశి ఓదెలకు ఇది కీలకమైన పరిచయ చిత్రం. తొలి సినిమాతోనే సహజమైన నటనతో ప్రేక్షకులను ఆకట్టుకునే ప్రయత్నం చేశాడు. ముఖ్యంగా తల్లిని కోల్పోవడం, ఆ తర్వాత ప్రేయసి అలిజాను కూడా కోల్పోవడంతో తీవ్ర మానసిక సంఘర్షణకు గురయ్యే పాత్రలో శశి తన నటనతో మెప్పించాడు. ప్రేక్షకులకు శశి ఓదెల పేరు మరో కారణంతో కూడా పరిచయం. మొదటి సినిమాతోనే రూ.100 కోట్ల రికార్డు సాధించిన దర్శకుడు శ్రీకాంత్ ఓదెల తమ్ముడిగా ఆయన చిత్ర పరిశ్రమలోకి వచ్చాడు. అంతకుముందు ‘దసరా’ సినిమాలో చిన్న పాత్రలో కనిపించి ఆకట్టుకున్న శశి.. ఇప్పుడు ‘KJQ’లో లీడ్ రోల్‌లో నటించి తనకంటూ ప్రత్యేకమైన ఇమేజ్‌ను ఏర్పరుచుకునే ప్రయత్నం చేశాడు.

మరోవైపు దీక్షిత్ శెట్టి ఈ సినిమాలో అత్యంత కీలకమైన పార్థా పాత్రను తనదైన శైలిలో పోషించాడు. అహంకారం, అధికారం, ఎదిరించే స్వభావం కలిసిన ఓ మనిషి ఎలా మారతాడో చూపించే పాత్రకు ఆయన పూర్తిగా న్యాయం చేశాడు. పార్థా పాత్రలోని నెగెటివ్ షేడ్స్‌ను, అతడి మానసిక స్థితిని, అధికారాన్ని సాధించాలనే తపనను దీక్షిత్ తన నటనతో బాగా చూపించాడు. పాత్ర సీరియస్‌గా సాగుతున్నప్పటికీ ఎక్కడా ఓవర్‌గా అనిపించకుండా తన నటనను బ్యాలెన్స్ చేయడం కనిపిస్తుంది.

సుమారు 1 గంట 50 నిమిషాల నిడివితో సాగే సినిమా ప్రేక్షకులను సీరియస్ మూడ్‌లోకి తీసుకెళ్తుంది. కథలో అనవసరమైన సాగతీత లేకపోవడం కూడా సినిమాకు ప్లస్‌గా నిలిచింది. మొత్తంగా చూస్తే దీక్షిత్ శెట్టి, శశి ఓదెల, యుక్తి తరేజా ముగ్గురూ తమ తమ పాత్రల్లో ఆకట్టుకున్నారు. ఈ యువ తారాగణం సినిమాను ముందుకు తీసుకెళ్లడంలో కీలకంగా నిలిచిందని చెప్పొచ్చు. ఇక చిచ్చా పాత్రలో మురళీధర్ గౌడ్ మరోసారి తనదైన నటనతో ఆకట్టుకున్నాడు. తన పాత్రకు అవసరమైన భావోద్వేగాలను, బాడీ లాంగ్వేజ్‌ను చక్కగా పలికించాడు.

దర్శకుడు కిరణ్ చివరి ప్రయత్నం.. ‘KJQ’ వెనుక ప్రత్యేక కథ

‘KJQ’ చిత్రంతో దర్శకుడు కిరణ్ తన ప్రయాణంలో మరో అడుగు వేయాలని భావించాడు. అంతకుముందు ‘కేడీ’ సినిమాతో దర్శకుడిగా తన ప్రయాణాన్ని ప్రారంభించిన ఆయన.. రెండో సినిమాగా ‘KJQ’ను రూపొందించాడు.అయితే సినిమా పూర్తయ్యే సమయంలో ఆయన అనారోగ్యానికి గురై కన్నుమూశారు. దర్శకుడి ఆకస్మిక మరణంతో సినిమా విడుదల కొంత ఆలస్యమైనప్పటికీ.. ఆయన చిరి ప్రయత్నాన్ని ప్రేక్షకుల ముందుకు తీసుకురావాలని చిత్ర బృందం పట్టుదలగా ముందుకు సాగింది.దర్శకుడు లేని సమయంలో సినిమాకు సంబంధించిన ప్రమోషన్స్‌లో పలువురు దర్శకులు, సినీ ప్రముఖులు పాల్గొని చిత్రానికి మద్దతుగా నిలిచారు. సంపత్ నంది, శ్రీకాంత్ ఓదెల వంటి దర్శకులు ఈ సినిమా ఈవెంట్లలో పాల్గొనడం కూడా ప్రేక్షకుల దృష్టిని ఆకర్షించింది.సినిమాను పూర్తిగా చూసినప్పుడు దర్శకుడు కిరణ్ కథను సీరియస్ టోన్‌లో చెప్పాలని ప్రయత్నించిన విషయం స్పష్టంగా కనిపిస్తుంది. క్రైమ్, యాక్షన్, భావోద్వేగాలు, మనిషి స్వభావంలోని చీకటి కోణాలను ఒకే కథలో చూపించే ప్రయత్నం చేశారు.

KJQ Movie Review: ప్లస్ పాయింట్స్ ఏంటి?

‘KJQ’ సినిమాకు ప్రధాన బలంగా నిలిచిన అంశాల్లో మొదట చెప్పుకోవాల్సింది హీరోలు, హీరోయిన్ పర్ఫామెన్స్. దీక్షిత్ శెట్టి, శశి ఓదెల, యుక్తి తరేజా తమ పాత్రలకు తగ్గట్టుగా నటించారు.ముఖ్యంగా దీక్షిత్ శెట్టి పోషించిన పార్థా పాత్ర, శశి ఓదెల చేసిన జాక్ పాత్రలు కథకు కీలకమైన వెయిట్‌ను తీసుకొచ్చాయి. యుక్తి తరేజా కూడా తన పాత్ర పరిధిలో ఆకట్టుకుంది.మరో ప్లస్ పాయింట్ సాగతీత లేకపోవడం. సినిమా నిడివి తక్కువగా ఉండటంతో కథను అవసరానికి మించి లాగకుండా ముందుకు తీసుకెళ్లారు. సీరియస్ కథ అయినప్పటికీ కథలో ప్రధాన సంఘటనలు త్వరగా చోటుచేసుకోవడం వల్ల సినిమా ఎక్కువ సమయం తీసుకున్న అనుభూతి రాదు.

KJQ Movie Review: మైనస్ పాయింట్స్ ఇవే

సినిమాలో క్రైమ్, యాక్షన్ అంశాలు ఉన్నప్పటికీ.. నేర తీవ్రతను మరింత బలంగా చూపించేందుకు అవసరమైన కొన్ని అంశాలు పూర్తిస్థాయిలో వర్కౌట్ కాలేదనే భావన కలుగుతుంది.అలాగే సినిమాలో హాస్యానికి పెద్దగా అవకాశం లేదు. కథ మొదటి నుంచి సీరియస్ టోన్‌లోనే సాగుతుంది. ఎమోషన్, క్రైమ్, యాక్షన్ అంశాలకే ఎక్కువ ప్రాధాన్యం ఇవ్వడంతో కామెడీ పూర్తిగా పక్కకు వెళ్లిపోయింది.సీరియస్ డోస్ ఎక్కువగా ఉండటం వల్ల కొంతమంది ప్రేక్షకులకు సినిమా కొద్దిగా హెవీగా అనిపించే అవకాశం ఉంది. ముఖ్యంగా లైట్ ఎంటర్‌టైన్‌మెంట్ కోరుకునే వారికి ఈ సినిమా పూర్తిగా సూట్ కాకపోవచ్చు.

KJQ Movie Review: చివరగా ఎలా ఉంది?

మొత్తంగా ‘KJQ’ ఓ సీరియస్ యాక్షన్, క్రైమ్, ఏ-రేటెడ్ డ్రామాగా ప్రేక్షకుల ముందుకు వచ్చింది. మనిషిలో పెరిగే అహం, అధికారం కోసం చేసే పోరాటం, ప్రేమను కోల్పోయిన తర్వాత జీవితాన్ని చూసే విధానం వంటి అంశాలను కథలో ముడిపెట్టారు.దీక్షిత్ శెట్టి పార్థా పాత్రలో, శశి ఓదెల జాక్ పాత్రలో ఆకట్టుకున్నారు. యుక్తి తరేజా కూడా తన పాత్రకు న్యాయం చేసింది. మురళీధర్ గౌడ్ తన అనుభవంతో పాత్రకు మరింత బలం ఇచ్చాడు.దర్శకుడు కిరణ్ ఆకస్మిక మరణం తర్వాత కూడా చిత్ర బృందం సినిమాను పూర్తి చేసి ప్రేక్షకుల ముందుకు తీసుకురావడం ఈ సినిమాకు ప్రత్యేకమైన నేపథ్యాన్ని ఇచ్చింది. ప్రమోషన్స్‌లో సందీప్ వంగా, సంపత్ నంది, శ్రీకాంత్ ఓదెల వంటి ప్రముఖులు పాల్గొనడం సినిమాపై ముందుగానే ఆసక్తిని పెంచింది.యువ నటీనటుల పర్ఫామెన్స్, సాగతీత లేకుండా సాగే కథనం సినిమాకు బలంగా నిలిస్తే.. నేర తీవ్రతను మరింత పెంచే అంశాల కొరత, హాస్యం లేకపోవడం, సీరియస్ టోన్ ఎక్కువగా ఉండటం మైనస్‌లుగా అనిపిస్తాయి. అయితే యాక్షన్, క్రైమ్, సీరియస్ డ్రామాలను ఇష్టపడే ప్రేక్షకులకు ‘KJQ’ ఒకసారి చూడదగిన సినిమాగా అనిపించవచ్చు. మొత్తంగా సినిమా ప్రేక్షకులను ఆకట్టుకునే స్థాయిలోనే ఉంది.

KJQ Movie Rating: 3/5

Ramu Tandu Ramalingaiah

Author Bio Info : Ramu Tandu Ramalingaiah is experienced in Media field. He worked in various Telugu media houses for about 15+ years. Iam worked as a Prajasakti Daily Newspaper , Surya Daily Newspaper , Namasthe Telangana Daily Newspaper News Reporter, Chief Editor, Digital Media Expert , Social Media Expert, Technical Expert and Digital Marketing Expert. As a News reporter, he wrote various articles on Human angle, Local news live reporting, special stories. He is also expert in news analyzing, proof editing and best title editing. He is the present Editor of thetelugunews.com | Contact Details : ramu@thetelugunews.com

Follow Us