Kavitha Resigns : బిఆర్ఎస్ పార్టీకి, ఎమ్మెల్సీ పదవికి రాజీనామా చేసిన కవిత
K Kavitha Resigns From The BRS & MLC : భారత రాష్ట్ర సమితి (BRS) పార్టీ నుంచి సస్పెండ్ అయిన ఎమ్మెల్సీ కల్వకుంట్ల కవిత తీవ్ర భావోద్వేగానికి లోనయ్యారు. తనను పార్టీ నుంచి తొలగించడం పట్ల ఆమె తీవ్ర ఆవేదన వ్యక్తం చేశారు. గత 20 ఏళ్లుగా తెలంగాణ ఉద్యమం, కేసీఆర్, బీఆర్ఎస్ పార్టీ, జాగృతి కోసం తన జీవితాన్ని అంకితం చేశానని కవిత గద్గద స్వరంతో తెలిపారు. తన జీవితంలో 27వ ఏట నుంచి 47వ ఏట వరకు తాను అంకితభావంతో పనిచేస్తే, ఇప్పుడు అకస్మాత్తుగా పార్టీతో తనకు ఏం సంబంధం లేదన్నట్లుగా సస్పెండ్ చేయడం తనను బాధించిందని ఆమె పేర్కొన్నారు.
#image_title
అయితే ఈ సస్పెన్షన్కు బాధపడినప్పటికీ తాను వెనక్కి తగ్గనని, ప్రజల మధ్యకు వెళ్తానని కవిత స్పష్టం చేశారు. ఈ సందర్భంగా ఆమె తన భవిష్యత్తు కార్యాచరణను కూడా సూచించారు. సస్పెన్షన్ ప్రకటన వచ్చిన మరుసటి రోజునే ఆమె పార్టీ సభ్యత్వానికి, ఎమ్మెల్సీ పదవికి రాజీనామా చేస్తున్నట్లు ప్రకటించారు. రాజీనామా లేఖలను మండలి ఛైర్మన్కు, తెలంగాణ భవన్కు పంపిస్తానని ఆమె తెలిపారు. ఈ నిర్ణయంతో ఆమె పూర్తిగా బీఆర్ఎస్ పార్టీకి దూరమైనట్లు అయింది.
కవిత రాజీనామా, ఆమె చేసిన భావోద్వేగ వ్యాఖ్యలు తెలంగాణ రాజకీయాల్లో కొత్త చర్చకు దారితీశాయి. పార్టీలో అంతర్గత విబేధాలు బహిర్గతమైన ఈ సమయంలో, కవిత తీసుకున్న ఈ నిర్ణయం భవిష్యత్తులో ఎలాంటి మార్పులకు దారితీస్తుందో చూడాలి. ఆమె ప్రజల మధ్యకు వెళ్తానని చెప్పడం, కొత్త రాజకీయ ప్రస్థానానికి సంకేతమని రాజకీయ విశ్లేషకులు భావిస్తున్నారు. ఈ పరిణామాలు బీఆర్ఎస్ పార్టీకి మరింత నష్టం కలిగించే అవకాశం ఉందని వారు అభిప్రాయపడుతున్నారు.