Ys Jagan : ఆంధ్రప్రదేశ్‌లో రాజకీయ పరిణామాలు మరింత ఆసక్తికరంగా మారుతున్నాయి. కూటమి ప్రభుత్వం పదినెలల పాలన పూర్తిచేసుకోగా, ముఖ్యంగా వైసీపీ లక్ష్యంగా వ్యూహాత్మకంగా అడుగులు వేస్తోంది. ఇదే సమయంలో స్థానిక సంస్థల ఉప ఎన్నికలు జరిగాయి. ఈ ఫలితాలు రాజకీయంగా కీలకంగా మారాయి. రాష్ట్రవ్యాప్తంగా మొత్తం 52 ఎంపీపీ స్థానాలకు ఎన్నికలు జరిగాయి. ఇందులో వైసీపీ 32 స్థానాలు గెలుచుకోగా, కూటమి 11 స్థానాలను మాత్రమే దక్కించుకుంది. ప్రత్యేకంగా కడప జిల్లా పరిషత్ ఎన్నికలలో కూటమి పోటీ నుంచి విరమించుకోవడం రాజకీయ వర్గాల్లో చర్చనీయాంశమైంది.

Ys Jagan కడపలో కూటమికి షాక్..ఎంపీపీ ఎన్నికల్లో వైసీపీ విజయం

ఈ ఎన్నికల ఫలితాలు రాజకీయ సమీకరణాల్లో కొత్త మార్పులను తెచ్చాయి. కడప జిల్లా పరిషత్‌ ఛైర్మన్‌గా వైసీపీ అభ్యర్థి రామగోవిందరెడ్డి ఏకగ్రీవంగా ఎన్నిక కావడం వైసీపీకి బలాన్ని ఇచ్చింది. అయితే 2024 ఎన్నికల్లో కూటమి ఘన విజయం సాధించిన నేపథ్యంలో తాజా ఎంపీపీ ఎన్నికల ఫలితాలు భిన్నంగా ఉండటం విశేషం. వైసీపీ తిరిగి పుంజుకుంటోందనే సంకేతాలు ఇచ్చే ఈ ఫలితాలు, అధికార పక్షానికి కొంత ఊరటనిస్తూనే, కూటమి నేతలను అప్రమత్తం చేయించాయి.

వివిధ జిల్లాల్లో జరిగిన ఎంపీపీ ఎన్నికల్లో వైసీపీ ఆధిక్యాన్ని ప్రదర్శించగా, టీడీపీ కొద్దిమందితో పరిమితమైంది. ఎన్టీఆర్ జిల్లా నందిగామ, సత్యసాయి జిల్లా రొద్దం, ప్రకాశం జిల్లా మార్కాపురం వంటి కీలక స్థానాల్లో వైసీపీ అభ్యర్థులు విజయాన్ని సాధించారు. కానీ పల్నాడు జిల్లా అచ్చంపేట ఎంపీపీ స్థానాన్ని టీడీపీ కైవసం చేసుకోవడం గమనార్హం. తాజా ఫలితాలు వైసీపీకి రాజకీయంగా కొంత ఊరటనిస్తూనే, భవిష్యత్ రాజకీయాలపై ఉత్కంఠ పెంచాయి. కూటమి తన వ్యూహాలను సమీక్షించుకుంటూ ముందుకు సాగుతుందా, లేక వైసీపీ మరింత బలపడుతుందా అనేది రాబోయే రాజకీయ పరిణామాలపై ఆధారపడి ఉంటుంది.