Against Mutual Funds : నేటి డిజిటల్ యుగంలో లోన్ తీసుకోవడం చాలా సులభమైపోయింది. పర్సనల్ లోన్, హోమ్ లోన్ వంటి వాటితో పాటు ఇప్పుడు ‘లోన్ ఎగైన్స్ట్ మ్యూచువల్ ఫండ్స్’ (LAMF) కు డిమాండ్ భారీగా పెరుగుతోంది. ముఖ్యంగా యువ ఇన్వెస్టర్లు తమ పెట్టుబడులను విక్రయించకుండానే అత్యవసర నిధుల కోసం ఈ మార్గాన్ని ఎంచుకుంటున్నారు.

Loan Against Mutual Funds అసలు ఏమిటి ఈ LAMF?

మీరు మ్యూచువల్ ఫండ్స్‌లో పెట్టిన పెట్టుబడులను తాకట్టు పెట్టి బ్యాంకులు, ఫిన్‌టెక్ సంస్థల నుండి తీసుకునే రుణాన్ని ‘లోన్ ఎగైన్స్ట్ మ్యూచువల్ ఫండ్స్’ అంటారు. గోల్డ్ లోన్ తరహాలోనే ఇది కూడా ఒక సెక్యూర్డ్ లోన్.

దీనివల్ల కలిగే ప్రధాన ప్రయోజనాలు ఏంటి?

మీరు మీ ఫండ్స్ అమ్మాల్సిన అవసరం లేదు. కాబట్టి మీ పెట్టుబడిపై వచ్చే కాంపౌండింగ్ ప్రయోజనం ఆగదు. పర్సనల్ లోన్స్‌తో పోలిస్తే వీటిపై వడ్డీ రేట్లు తక్కువగా (సుమారు 10-12.5 శాతం) ఉంటాయి. మ్యూచువల్ ఫండ్స్ విక్రయిస్తే క్యాపిటల్ గెయిన్స్ టాక్స్ కట్టాలి. కానీ లోన్ తీసుకుంటే ఎలాంటి పన్ను ఉండదు. మీరు ఉపయోగించుకున్న మొత్తంపైనే వడ్డీ పడుతుంది. అలాగే రీపేమెంట్ విషయంలో కూడా సాధారణ ఈఎంఐ కంటే ఎక్కువ వెసులుబాటు ఉంటుంది.

ఎప్పుడు తీసుకోవాలి?

మార్కెట్ గరిష్ట స్థాయి (Peak)లో ఉన్నప్పుడు కాకుండా, మార్కెట్ ఒడిదుడుకుల్లో ఉన్నప్పుడు ఈ లోన్ తీసుకోవడం మేలని నిపుణులు సూచిస్తున్నారు. ఎందుకంటే మార్కెట్ పడిపోయినప్పుడు మీ ఫండ్స్ విలువ తగ్గితే, బ్యాంకులు అదనపు మార్జిన్ చెల్లించమని కోరే (Margin Call) అవకాశం ఉంటుంది.

విలాసాల కోసం లోన్ వద్దు

విలాసాల కోసం కాకుండా, పిల్లల ఫీజులు, హోమ్ లోన్ డౌన్ పేమెంట్ లాంటి అత్యవసర సమయాల్లో మాత్రమే ఈ లోన్ వాడండి. రిటైర్మెంట్ కోసం లేదంటే పిల్లల పెళ్లి కోసం దాచుకున్న ఫండ్స్‌ను తాకట్టు పెట్టకపోవడం మంచిది.

రీపేమెంట్ ఆలస్యమైతే మీ సిబిల్ (CIBIL) స్కోరు దెబ్బతినడమే కాకుండా, బ్యాంకులు మీ ఫండ్స్ యూనిట్లను విక్రయించి తమ సొమ్మును రికవరీ చేసుకునే ప్రమాదం ఉంది. మ్యూచువల్ ఫండ్స్‌పై లోన్ అనేది ఆర్థిక అత్యవసర సమయాల్లో ఒక అద్భుతమైన వరం. అయితే మార్కెట్ రిస్క్‌ను అంచనా వేస్తూ, క్రమశిక్షణతో కూడిన రీపేమెంట్ ప్లాన్ ఉన్నప్పుడు మాత్రమే ఈ మార్గాన్ని ఎంచుకోవడం మీ ఆర్థిక ప్రణాళికను బెటర్‌గా ఉంచుతుంది.