Dates vs Almonds : చలికాలంలో చాలా మందిలో రోగనిరోధక శక్తి తగ్గిపోవడం సహజం. వాతావరణ మార్పుల కారణంగా జలుబు, దగ్గు, అలసట వంటి సమస్యలు ఎక్కువగా కనిపిస్తాయి. ఈ సమయంలో శరీరాన్ని లోపల నుంచి వెచ్చగా ఉంచే, రోగనిరోధక శక్తిని పెంచే ఆహారాలను తీసుకోవడం అత్యంత అవసరం. అందుకే పోషకాహార నిపుణులు డ్రై ఫ్రూట్స్‌ను రోజువారీ ఆహారంలో భాగం చేసుకోవాలని సూచిస్తున్నారు. ముఖ్యంగా ఖర్జూరం, బాదం ఈ సీజన్‌లో ప్రత్యేక ప్రాధాన్యం పొందాయి. ఇవి రెండూ ఆరోగ్యానికి మేలు చేస్తాయి. అయితే వాటి ప్రయోజనాలు భిన్నంగా ఉంటాయి. మరి శీతాకాలంలో ఏది తీసుకోవాలి? వాటి వల్ల కలిగే లాభాలు ఏమిటి? తెలుసుకుందాం.

Dates vs Almonds : ఖర్జూరం: తక్షణ శక్తికి సహజ వనరు

ఖర్జూరాలు సహజ చక్కెరలైన గ్లూకోజ్, ఫ్రక్టోజ్‌లకు ప్రసిద్ధి. ఇవి శరీరానికి వెంటనే శక్తిని అందిస్తాయి. ఉదయం అలసటగా అనిపించినప్పుడు 2 నుంచి 3 ఖర్జూరాలు తీసుకుంటే ఉత్సాహం పెరుగుతుంది. చలి కారణంగా శరీరం బలహీనపడినప్పుడు ఇవి మంచి శక్తి వనరుగా పనిచేస్తాయి. ఖర్జూరాలలో ఇనుము అధికంగా ఉండటం వల్ల హిమోగ్లోబిన్ స్థాయిలను మెరుగుపరచడంలో సహాయపడతాయి. ముఖ్యంగా రక్తహీనత సమస్య ఉన్నవారికి ఇవి ప్రయోజనకరంగా ఉంటాయి. అదనంగా వీటిలో ఉండే ఫైబర్ జీర్ణక్రియను మెరుగుపరచి మలబద్ధకాన్ని తగ్గిస్తుంది. శీతాకాలంలో తక్కువగా నీరు తాగడం వల్ల జీర్ణ సమస్యలు రావచ్చు. అలాంటి సమయంలో ఖర్జూరాలు ఉపశమనం ఇస్తాయి. ఇవి శరీరాన్ని లోపల నుంచి వెచ్చగా ఉంచడంలో కూడా సహాయపడతాయి. అయితే అధికంగా తీసుకుంటే చక్కెర స్థాయిలు పెరిగే అవకాశం ఉంటుంది. అందువల్ల మితంగా తీసుకోవడం మంచిది.

Dates vs Almonds : బాదం: దీర్ఘకాలిక శక్తి మరియు సమగ్ర ఆరోగ్యం

బాదం తక్షణ శక్తిని ఇవ్వకపోయినా దీర్ఘకాలం పాటు స్థిరమైన శక్తిని అందిస్తుంది. ఇందులో ఉన్న ప్రోటీన్, ఆరోగ్యకరమైన కొవ్వులు, ఫైబర్ శరీరాన్ని బలంగా ఉంచుతాయి. చలికాలంలో శరీరానికి అవసరమైన పోషకాలు అందించడంలో బాదం కీలక పాత్ర పోషిస్తుంది. బాదంలో విటమిన్ E పుష్కలంగా ఉంటుంది. ఇది చలికాలంలో పొడి చర్మ సమస్యలను తగ్గించడంలో సహాయపడుతుంది. అలాగే యాంటీ ఆక్సిడెంట్లు రోగనిరోధక శక్తిని పెంచి, శరీరాన్ని ఇన్‌ఫెక్షన్ల నుంచి రక్షిస్తాయి. మెదడు ఆరోగ్యానికి కూడా బాదం ఎంతో మేలు చేస్తుంది. జ్ఞాపకశక్తి మెరుగుపడేందుకు సహాయపడుతుంది. రాత్రి నీటిలో నానబెట్టి ఉదయం తినడం వల్ల బాదం లోని పోషకాలు సులభంగా శరీరానికి అందుతాయి. ఇది కొలెస్ట్రాల్ స్థాయిలను నియంత్రించడంలో కూడా దోహదం చేస్తుంది.

Dates vs Almonds : శీతాకాలంలో ఏది ఉత్తమం?

ఖర్జూరం, బాదం రెండూ శీతాకాలానికి అనుకూలమైన ఆహారాలు. తక్షణ శక్తి అవసరమైనప్పుడు ఖర్జూరం మంచిది. జలుబు, అలసటతో బాధపడుతున్నవారికి ఇవి ఉపయోగపడతాయి. శరీరాన్ని వేడి ఉంచడంలో కూడా సహాయపడతాయి. అయితే దీర్ఘకాలిక ఆరోగ్యం, స్థిరమైన శక్తి, మెరుగైన రోగనిరోధక శక్తి కోసం బాదం ఉత్తమ ఎంపికగా చెప్పవచ్చు. రోజూ 10-12 నానబెట్టిన బాదం తీసుకోవడం అలవాటు చేసుకుంటే శరీరం బలంగా ఉంటుంది. ఇకపోతే.. ఒకదానికంటే మరొకటి మెరుగైనదని చెప్పడం కష్టం. వ్యక్తిగత అవసరాలను బట్టి రెండింటినీ మితంగా ఆహారంలో చేర్చుకోవడం శ్రేయస్కరం. సరైన పోషకాహారం తగిన నిద్ర, వ్యాయామం కలిసివస్తేనే శీతాకాలాన్ని ఆరోగ్యంగా ఎదుర్కొనగలం.