New SIM Card : మన రోజువారీ జీవితంలో మొబైల్ ఫోన్(Mobile phone) అనివార్య భాగంగా మారిపోయింది. పిల్లలు స్కూల్‌కు వెళ్లినప్పటి నుంచి ఉద్యోగాలు, బ్యాంకింగ్ లావాదేవీలు, కుటుంబ సభ్యులతో సంభాషణల వరకు ప్రతిదీ మొబైల్ చుట్టూనే తిరుగుతోంది. అలాంటి మొబైల్‌కు ప్రాణం పోసేది సిమ్ కార్డు. అయితే ఇటీవల మనకు తెలియకుండానే మన పేరుతో సిమ్ కార్డులు(SIM cards) తీసుకుని మోసాలకు పాల్పడుతున్న ఘటనలు పెరిగిపోవడంతో సామాన్య మధ్యతరగతి ప్రజల్లో భయం నెలకొంది. ఈ పరిస్థితికి చెక్ పెట్టేందుకు కేంద్ర ప్రభుత్వం ట్రాయ్ (TRAI) కలిసి కీలకమైన మార్పులను అమలు చేస్తున్నాయి.

New SIM Card : సిమ్ కొనుగోలు ప్రక్రియలో కీలక మార్పులు

ఇంతకు ముందు సిమ్ కార్డు కొనాలంటే పత్రాల జిరాక్స్ కాపీలు ఇచ్చి ఎవరో ఒకరి ద్వారా కూడా సిమ్ తీసుకునే అవకాశం ఉండేది. కానీ ఇప్పుడు ఆ విధానం పూర్తిగా మారింది. కొత్త నిబంధనల ప్రకారం ఎవరి పేరుతో సిమ్ తీసుకుంటున్నారో ఆ వ్యక్తి స్వయంగా టెలికాం స్టోర్‌కు వెళ్లాల్సిందే. ఇది కొంత అసౌకర్యంగా అనిపించినా మధ్యవర్తులు మన పత్రాలను దుర్వినియోగం చేయకుండా అడ్డుకునే బలమైన చర్య. ఇకపై మన పేరు మీద మనకు తెలియకుండా సిమ్ తీసుకోవడం దాదాపు అసాధ్యం కానుంది.

New SIM Card : ఆధార్, బయోమెట్రిక్ మరియు లైవ్ ఫోటో వెరిఫికేషన్

సిమ్ కొనుగోలు సమయంలో ఆధార్ ఆధారిత బయోమెట్రిక్ ధృవీకరణ తప్పనిసరి చేశారు. స్టోర్‌లోనే వేలిముద్ర తీసి ఆధార్ సర్వర్‌తో సరిపోల్చడం ద్వారా ఆ వ్యక్తి నిజంగా ఆయనేనా కాదా అని నిర్ధారిస్తారు. అంతేకాదు కస్టమర్ యొక్క లైవ్ ఫోటోను అక్కడికక్కడే తీసుకోవాలి. పాత ఫోటోలు లేదా నకిలీ పత్రాలకు ఇక అవకాశం ఉండదు. ఈ విధానం ద్వారా నకిలీ గుర్తింపులతో సిమ్ తీసుకుని మోసాలు చేసే వారికి గట్టి దెబ్బ పడనుంది.

New SIM Card :  AI టెక్నాలజీతో మోసాల గుర్తింపు

ప్రభుత్వం కృత్రిమ మేధస్సు (AI) టెక్నాలజీని కూడా వినియోగించనుంది. ఒకే వ్యక్తి పేరుతో అవసరానికి మించిన సిమ్‌లు ఉన్నాయా? ఒకే ఫోటో లేదా ఇలాంటి పత్రాలతో వందలాది సిమ్‌లు తీసుకున్నారా? వంటి అంశాలను AI సులభంగా గుర్తించి అధికారులకు సమాచారం అందిస్తుంది. దీంతో సైబర్ నేరాలు, మోసపూరిత కాల్స్, బ్యాంకింగ్ మోసాలకు మూలమైన నకిలీ సిమ్‌లపై సమర్థవంతమైన నిఘా సాధ్యమవుతుంది. టెలికాం కంపెనీలు కూడా ఈ నిబంధనలను కచ్చితంగా పాటించాల్సిందే. e-KYC లేదా ఆధార్ ధృవీకరణ లేకుండా సిమ్ విక్రయిస్తే భారీ జరిమానాలు విధిస్తామని ప్రభుత్వం స్పష్టం చేసింది. దీని వల్ల కంపెనీలు మరింత బాధ్యతతో వ్యవహరించాల్సి వస్తుంది. ఇకపోతే..డిజిటల్ యుగంలో సౌకర్యాలతో పాటు ముప్పులు కూడా పెరుగుతున్నాయి. కానీ ప్రభుత్వం తీసుకున్న ఈ కఠిన నిర్ణయాలు సామాన్యుల భద్రతకు భరోసా ఇస్తున్నాయి. సిమ్ కార్డు కోసం స్వయంగా వెళ్లి బయోమెట్రిక్ ఇవ్వడం కొంత సమయం తీసుకున్నా దీర్ఘకాలికంగా మన వ్యక్తిగత సమాచారం సురక్షితంగా ఉండేందుకు ఇది అవసరమైన అడుగు. మన భద్రత మన చేతుల్లోనే ఉంది. కొత్త నిబంధనలను పాటిద్దాం మోసాలకు దూరంగా ఉందాం.