Weather | తెలుగు రాష్ట్రాల్లో పలు జిల్లాల్లో మోస్తరు నుంచి భారీ వర్షాలు కురుస్తున్నాయి. ఇప్పటికే పెద్దపల్లి, భద్రాద్రి కొత్తగూడెం, ఖమ్మం, వరంగల్, హనుమకొండ, జనగామ, ములుగు, నల్గొండ, సూర్యాపేట, హైదరాబాద్ వంటి జిల్లాల్లో జల్లులు మొదలై మోస్తరు వర్షాలుగా మారాయి. ఈ వర్షాలు రెండు నుంచి మూడు రోజులు కొనసాగే అవకాశముందని వాతావరణ శాఖ హెచ్చరించింది.

నైరుతి రుతుపవనాల నిష్క్రమణ ప్రభావం

ఉత్తర భారతదేశం నుంచి నైరుతి రుతుపవనాల నిష్క్రమణ ప్రక్రియ వేగంగా సాగుతున్న నేపథ్యంలో, తెలంగాణ ప్రాంతంలో ప్రస్తుతం వర్షాలు నమోదవుతున్నాయి. సెప్టెంబర్ 20 నాటికి నైరుతి రుతుపవనాలు ఉత్తర భారతదేశాన్ని పూర్తిగా కప్పగా, సెప్టెంబర్ 24 నుంచి తిరుగుముఖం పట్టినట్లు అధికారులు వెల్లడించారు.

వాతావరణ శాఖ అంచనా ప్రకారం, ఈ నెల 15వ తేదీ నాటికి రుతుపవనాలు రాష్ట్రం నుంచి పూర్తిగా నిష్క్రమించనున్నాయి. అప్పటివరకు వర్షాల ప్రభావం కొనసాగనుంది.

ఇవాళ, రేపు వర్షాలకు గురయ్యే జిల్లాలు:

పెద్దపల్లి

భద్రాద్రి కొత్తగూడెం

ఖమ్మం

వరంగల్, హనుమకొండ

మహబూబాబాద్, ములుగు

జయశంకర్ భూపాలపల్లి

నల్గొండ, సూర్యాపేట

నాగర్‌కర్నూల్, వనపర్తి, జోగులాంబ గద్వాల

రంగారెడ్డి, మేడ్చల్ మల్కాజ్‌గిరి

హైదరాబాద్

ఈ జిల్లాల్లో పలు ప్రాంతాల్లో ఉరుములతో కూడిన వర్షాలు కురిసే అవకాశం ఉన్నందున ప్రజలు అప్రమత్తంగా ఉండాలని వాతావరణ శాఖ సూచించింది.