KCR Big decision : తెలంగాణ రాజకీయాలు ఎప్పుడూ ఊహించని మలుపులతో వేడెక్కుతుంటాయి. మొన్నటి అసెంబ్లీ ఎన్నికలు, నిన్నటి మున్సిపల్ ఫలితాల తర్వాత అంతా సైలెంట్ అయిపోయారు అనుకుంటున్న తరుణంలో, గులాబీ బాస్ కేసీఆర్ మళ్ళీ తన మార్కు రాజకీయానికి తెరలేపారు. రాజ్యసభ ఎన్నికల వేళ ఆయన తీసుకున్న ఒక నిర్ణయం ఇప్పుడు రాష్ట్ర రాజకీయాల్లో హాట్ టాపిక్ గా మారింది. ముఖ్యంగా అధికార కాంగ్రెస్ పార్టీకి, ముఖ్యమంత్రి రేవంత్ రెడ్డికి ఇది ఒక సవాల్‌గా మారబోతోందా అనే చర్చ మొదలైంది.

ప్రస్తుతం తెలంగాణ నుంచి రెండు రాజ్యసభ స్థానాలకు ఎన్నికలు జరగనున్నాయి. అసెంబ్లీలో ఉన్న ఎమ్మెల్యేల బలం ప్రకారం చూస్తే, కాంగ్రెస్ పార్టీకి ఈ రెండు సీట్లు నల్లేరు మీద నడకే అని అందరూ భావించారు. కాంగ్రెస్ కూడా అభ్యర్థులను దాదాపు ఖరారు చేసేసింది. కానీ, సరిగ్గా ఇక్కడే కేసీఆర్ తన వ్యూహాన్ని బయటకు తీశారు. సంఖ్యా బలం తక్కువగా ఉన్నప్పటికీ, రాజ్యసభ బరిలో బీఆర్ఎస్ అభ్యర్థిని నిలబెట్టాలని ఆయన యోచిస్తున్నారు.

రేవంత్‌కి షాక్ ఎందుకు?

సాధారణంగా గెలిచే అవకాశం లేనప్పుడు ఏ పార్టీ అయినా పోటీకి దూరంగా ఉంటుంది. కానీ కేసీఆర్ ఇక్కడ ఒక ‘చెక్’ పెట్టాలని చూస్తున్నారు. బీఆర్ఎస్ నుంచి గెలిచిన కొంతమంది ఎమ్మెల్యేలు ఇప్పటికే కాంగ్రెస్ గూటికి చేరారు. రాజ్యసభ ఎన్నికల్లో ‘విప్’ వర్తిస్తుంది. అంటే ఎమ్మెల్యేలు తమ పార్టీ అభ్యర్థికే ఓటు వేయాలి, పైగా ఆ ఓటును పార్టీ ఏజెంట్‌కు చూపించాలి. ఇప్పుడు కేసీఆర్ అభ్యర్థిని నిలబెడితే, కాంగ్రెస్ లోకి వెళ్ళిన బీఆర్ఎస్ ఎమ్మెల్యేలు ఇరకాటంలో పడతారు. వారు కాంగ్రెస్ అభ్యర్థికి ఓటు వేస్తే పార్టీ ఫిరాయింపుల కింద వేటు పడే అవకాశం ఉంటుంది, ఒకవేళ భయపడి బీఆర్ఎస్ కే ఓటు వేస్తే రేవంత్ రెడ్డి పరువు పోతుంది.అంతేకాకుండా, సంఖ్యా పరంగా చూస్తే ఒక అభ్యర్థి గెలవడానికి 41 ఓట్లు కావాలి.ఈ గందరగోళాన్ని ఉపయోగించుకుని కాంగ్రెస్ క్యాంప్‌లో గుబులు పుట్టించాలనేది కేసీఆర్ ప్లాన్. మొత్తానికి, కేసీఆర్ తీసుకున్న ఈ నిర్ణయం కేవలం ఒక సీటు కోసం కాదు, కాంగ్రెస్‌లోకి వెళ్ళిన తమ ఎమ్మెల్యేలను ఇరుకున పెట్టడానికి మరియు రేవంత్ రెడ్డి సర్కారుపై పైచేయి సాధించడానికి వేసిన ఎత్తుగడగా రాజకీయ విశ్లేషకులు భావిస్తున్నారు. ఈ పోరులో గెలుపు ఎవరిదైనా, తెలంగాణ రాజకీయాల్లో ఈ రాజ్యసభ ఎన్నికలు మాత్రం హై వోల్టేజ్ డ్రామాను తలపించడం ఖాయం.