Mana Shankara Vara Prasad Garu :  మెగాస్టార్ చిరంజీవి నటించిన లేటెస్ట్ ఫ్యామిలీ ఎంటర్టైనర్ ‘మన శంకర వరప్రసాద్ గారు’ బాక్సాఫీస్ వద్ద విజృంభిస్తోంది. సంక్రాంతి కానుకగా జనవరి 12న విడుదలైన ఈ చిత్రం, బాక్సాఫీస్ వద్ద కాసుల వర్షం కురిపిస్తూ మెగాస్టార్ పాత రికార్డులను తిరగరాస్తోంది. మెగాస్టార్ చిరంజీవి సరైన ఫ్యామిలీ కథతో ప్రేక్షకుల ముందుకు వచ్చారు. సక్సెస్ ఫుల్ డైరెక్టర్ అనిల్ రావిపూడి మార్క్ కామెడీ మరియు ఎమోషన్స్ ఈ సినిమాను బ్లాక్ బస్టర్ దిశగా టాక్ తెచ్చుకుంది. సినిమా ఘనవిజయం సాధించడంతో అనిల్ రావిపూడి స్వయంగా చిరంజీవిని కలిసి భావోద్వేగానికి లోనయ్యారు. ముఖ్యంగా గతేడాది ‘సంక్రాంతికి వస్తున్నాం’ చిత్రంతో హిట్ కొట్టిన అనిల్, ఇప్పుడు అంతకు మించిన విజయాన్ని మెగాస్టార్‌తో అందుకోవడం విశేషం. థియేటర్ల వద్ద టికెట్ల కోసం రద్దీ విపరీతంగా ఉండటంతో, పండగ సెలవులు ముగిసే వరకు ఈ జోరు ఇలాగే కొనసాగే అవకాశం ఉంది.

ఈ చిత్రంలో మెగాస్టార్ సరసన నయనతార నటించగా, విక్టరీ వెంకటేష్ గెస్ట్ రోల్‌లో కనిపించి ప్రేక్షకులను సర్ప్రైజ్ చేశారు. వెంకటేష్ ఎంట్రీ సీన్ థియేటర్లలో ఈలలు, గోలలతో మారుమోగిపోతోంది. భీమ్స్ సిసిరోలియో అందించిన సంగీతం, ముఖ్యంగా నేపథ్య సంగీతం సినిమాకు పెద్ద అసెట్‌గా నిలిచింది. షైన్ స్క్రీన్ బ్యానర్ పై సాహు గారపాటి మరియు సుస్మిత కొణిదెల ఎక్కడా రాజీ పడకుండా ఈ సినిమాను నిర్మించారు. మెగాస్టార్ తన నటనతో, డ్యాన్సులతో మరోసారి తన బాక్సాఫీస్ స్టామినాను నిరూపించుకున్నారు. ఫ్యామిలీ ఆడియన్స్ కూడా బ్రహ్మరథం పట్టడంతో మెగా ఫ్యాన్స్ ఫుల్ జోష్‌లో ఉన్నారు.

ఓటీటీ మరియు శాటిలైట్ హక్కులు ఈ సినిమా థియేటర్లలో రన్ అవుతుండగానే, దీని డిజిటల్ మరియు శాటిలైట్ హక్కులకు సంబంధించి ఆసక్తికరమైన సమాచారం బయటకు వచ్చింది. ఈ మూవీ భారీ ధరకు జీ5 (ZEE5) ఓటీటీ వేదికగా స్ట్రీమింగ్ కానుంది. అలాగే ‘జీ తెలుగు’ ఛానెల్ శాటిలైట్ హక్కులను సొంతం చేసుకుంది. సాధారణంగా పెద్ద సినిమాలు విడుదలైన 4 వారాల తర్వాత ఓటీటీలోకి వస్తుంటాయి. ఆ లెక్కన చూస్తే, ఫిబ్రవరి మధ్యలో వాలెంటైన్స్ డే సందర్భంగా ఈ సినిమా డిజిటల్ సందడి చేసే అవకాశం ఉంది. థియేటర్లలో మిస్ అయిన వారు అప్పటి వరకు వేచి చూడాల్సిందే.