Roja : ఆంధ్రప్రదేశ్ రాజకీయాలు రోజుకో మలుపు తిరుగుతున్నాయి. కూటమి ప్రభుత్వం పదినెలల పాలనను పూర్తి చేసుకొని, మే నెల నుంచి ఎన్నికల హామీల అమలుపై దృష్టి పెడుతోంది. అయితే ఈ నేపథ్యంలో అధికార టీడీపీ, జనసేన కూటమిపై వైసీపీ నేతలు తీవ్ర విమర్శలు గుప్పిస్తున్నారు. ముఖ్యమంత్రి చంద్రబాబు నాయుడు ఇటీవల “మేము ఇస్తున్న పెన్షన్లు గత ప్రభుత్వానికన్నా ఎక్కువ” అంటూ చేసిన వ్యాఖ్యలు చర్చనీయాంశమయ్యాయి. మరోవైపు స్థానిక సంస్థల బైపోల్స్‌లో గెలిచిన పార్టీ నేతలతో జగన్ సమావేశమై, ప్రభుత్వ వైఫల్యాలపై చర్చించారు. వైసీపీ మాజీ మంత్రులు, ముఖ్యంగా రోజా కొత్త ప్రభుత్వం హామీల అమలుపై నిలదీస్తూ విమర్శల దాడికి దిగారు.

Roja  ఏపీ రాజకీయాల్లో వేడెక్కిన వివాదాలు – హామీల అమలుపై వైసీపీ దాడి

ప్రస్తుత ప్రభుత్వం వైసీపీ హయాంలో జరిగిన అక్రమాలపై దర్యాప్తును ముమ్మరం చేస్తోంది. రెవెన్యూ శాఖ నివేదిక ప్రకారం.. ఆరుగురు మాజీ మంత్రుల ప్రమేయం ఉన్నట్లు తేలింది. మాజీ మంత్రి కాకాని గోవర్ధన్ రెడ్డికి మైనింగ్ కేసులో నోటీసులు జారీ అయ్యాయి. ఈ తరుణంలో రోజా ప్రభుత్వంపై తీవ్రమైన విమర్శలు చేస్తూ, “పదినెలలు అవుతున్నా, కేవలం పెన్షన్లు మాత్రమే ఇచ్చారు, మిగతా హామీలు ఏమయ్యాయి?” అంటూ నిలదీశారు. అంతేకాదు కూటమి ప్రభుత్వం మూడు లక్షల మందికి పెన్షన్లు కోత పెట్టిందని ఆరోపించారు. మహిళల ఉచిత బస్సు ప్రయోజనం ఇప్పటి వరకు అమలు కాలేదని, తల్లికి వందనం వంటి పథకాలు మాటలకే పరిమితమయ్యాయని విమర్శించారు.

“తొలి ఏడాదిలో లక్షా 52 వేల కోట్లు అప్పు చేశారు, కానీ ఎక్కడా అభివృద్ధి కనిపించడం లేదు” అని ఆరోపించారు. వాలంటీర్ల వ్యవస్థను నిర్వీర్యం చేసేందుకు ప్రయత్నిస్తున్నారని, నిరుద్యోగులను మోసం చేశారని మండిపడ్డారు. సూపర్ సిక్స్ అమలుపై స్పష్టత లేదని, వాహనదారులు ఇప్పటికీ సమస్యలు ఎదుర్కొంటున్నారని అన్నారు. చంద్రబాబు నివాసానికి సమీపంలోనే బెల్టు షాపులు ఉన్నాయని, ఆయన కుటుంబమే పీ-4 ద్వారా లాభపడుతోందని విమర్శలు గుప్పించారు. పవన్ కళ్యాణ్ మౌనంగా ఉన్నారని, మహిళలపై జరుగుతున్న ఘటనలపై స్పందించాలంటూ ప్రశ్నించారు.