Kalyan – Thanuja : బిగ్ బాస్ తెలుగు సీజన్ 9 ముగిసి రెండు నెలలు కావస్తున్నా, విన్నర్ కళ్యాణ్ పడాల మరియు రన్నరప్ తనూజల గురించి సోషల్ మీడియాలో చర్చలు అస్సలు తగ్గడం లేదు. హౌస్‌లో ఉన్నప్పుడు వీరిద్దరి మధ్య ఉన్న అనుబంధం కేవలం స్నేహమా లేక అంతకు మించి ఏదైనా ఉందా అన్నది ప్రేక్షకులకు ఎప్పుడూ ఒక పెద్ద సవాలే. తెలుగు బిగ్ బాస్ చరిత్రలో విన్నర్, రన్నర్ ఒకరికొకరు ఇంతలా సపోర్ట్ చేసుకున్న సందర్భాలు చాలా అరుదు. అయితే బయటకు వచ్చాక వీరిద్దరి మధ్య గ్యాప్ వచ్చిందని, ఒకరినొకరు కలుసుకోవడం లేదని వస్తున్న వార్తలతో ఇద్దరి అభిమానుల మధ్య పెద్ద యుద్ధమే నడిచింది. తనూజ కేవలం గేమ్ కోసం కళ్యాణ్‌ని వాడుకుందని కొందరు అంటే, కళ్యాణ్ కోసం తనూజ తన గెలుపును త్యాగం చేసిందని మరికొందరు వాదించుకున్నారు.

Kalyan – Thanuja అసలు ఎందుకు ఈ వార్తలు వచ్చాయి

ఇక ఈ చర్చలకు తెరదించుతూ తాజాగా స్టార్ మా నిర్వహించిన ‘BB ఉత్సవం’ షూటింగ్ సందడి మొదలైంది. ఈ కార్యక్రమంలో సీజన్ 9 కంటెస్టెంట్స్ అందరూ హాజరై సందడి చేశారు. అయితే ఈ షూటింగ్‌కు సంబంధించిన కొన్ని వీడియోలు సోషల్ మీడియాలో లీక్ అవ్వడంతో ఒక్కసారిగా అందరూ షాక్‌కు గురయ్యారు. ఆ వీడియోలో తనూజ ఏకంగా కళ్యాణ్ వేలికి రింగు తొడగడం కనిపిస్తోంది. ఇది చూసిన నెటిజన్లు వీరిద్దరి మధ్య మళ్ళీ ‘సమ్‌థింగ్ సమ్‌థింగ్’ మొదలైందని, అసలు వీరి బంధం ఎక్కడి వరకు వెళ్తుందో అని ఆసక్తిగా మాట్లాడుకుంటున్నారు. కేవలం రింగు తొడగడమే కాకుండా, వీరిద్దరూ కలిసి ‘చుట్టమల్లే’ పాటకు ఎంతో రొమాంటిక్‌గా స్టెప్పులు వేసినట్లు తెలుస్తోంది.

ఈ ‘BB ఉత్సవం’ ఎపిసోడ్ ప్రసారం కాకముందే ఈ లీకైన వీడియోలు నెట్టింట హల్చల్ చేస్తున్నాయి. కళ్యాణ్ తన విజయంలో తనూజ పాత్ర చాలా ఉందని గతంలోనే చెప్పగా, ఇప్పుడు ఇలా రింగులు మార్చుకునే వరకు వ్యవహారం వెళ్లడంతో వీరిద్దరి రిలేషన్ గురించి కొత్త పుకార్లు షికారు చేస్తున్నాయి. ఈ ఉత్సవం ద్వారా వీరిద్దరి మధ్య ఉన్నది కేవలం స్నేహమేనా లేక ఏదైనా అధికారికంగా ప్రకటించబోతున్నారా అన్నది చూడాలి. ఏదేమైనా బిగ్ బాస్ ముగిసినా కూడా కళ్యాణ్, తనూజ జోడీ మాత్రం బుల్లితెరపై మళ్ళీ సెంటర్ ఆఫ్ అట్రాక్షన్‌గా మారింది.